Makiki-Hunger Games

September of last year nang magkayayaan kami ng mga kaibigan ko sa opisina na manood ng Abduction kung saan bida si Taylor Lautner. Siguro nagtakaka kayo kung ano ang connect ng Abduction sa Hunger Games? Ganito kasi yun, pagbili namin ng ticket nagulat kami lahat nang binigyan kami ng tig-iisang kopya ng libro ng Hunger Games. Bilang hindi naman kami mga palabasa ng kaibigan ko, walang nakakaalam sa amin kung tungkol saan ba tong libro na natanggap namin. Naisip namin na siguro wala tong kuwenta kasi bakit ipapamigay ng libre. Ang iba sa amin, tinapon lang ang kopya na natanggap nila. Medyo hassle daw dalhin kasi may iba pa kaming lakad nung gabing un. Ako naman, pinili kong itago ang libro na natanggap ko. Sabi ko sa sarili ko, ilalagay ko 'to sa CR para may babasahin ako habang sumasagot ako sa tawag ng kalikasan. 

Ang kopya ko ng Hunger Games kasama ng ibang magazines sa CR

Madami naman akong nabasa. Siguro mga 3 pages. Mas madalas kasi ako mag Facebook pag nasa trono ako. Nalaman ko lang sa blog ni Chico Garcia na sikat pala ung libro na natanggap namin at katunayan nagawan na ito ng pelikula. Agad ko namang ibinalita eto sa mga kaibigan ko para ipamukha sa kanila kung gaano sa ka-tanga manghinayang sila. 

Nauna ata ang premiere ng Hunger Games sa Pinas at ang dami nagpopost sa Facebook na maganda nga daw ang pelikula. Dahil dito, pinanood namin eto last Friday. Ang masasabi ko, maganda nga! Hindi din naman ako mahirap i-please. Gusto ko kapag ang pelikula ay dinadala ako sa ibang mundo at matagumpay itong nagawa ng Hunger  Games. Hindi ko namalayan na mahigit 2 oras pala ang tinakbo ng pelikula dahil talagang kaabang-abang ang bawat eksena. Hindi tulad ng John Carter na dinala nga ako sa ibang mundo pero nainip naman ako at gustong gusto ko na tapusin nila ang pelikula. Medyo twisted lang ng unti ang plot ng Hunger Games. Bakit kailangan mga bata pa ang kailangang magpatayan sa istorya? 

Dahil dito sinimulan ko na uli basahin ang libro. From CR dinala ko na sya sa aking kuwarto. Sa unang kabanata pa lang ng libro naintindihan ko na kung bakit ganun ka-twisted ang plot ng pelikula. Inexplain naman kasi dun. Medyo premature 'tong post ko kasi di ko pa maiikumpara ang libro at pelikula pero baka abutin naman kasi ako ng ilang buwan bago ko matapos ang libro. 

Narealize ko din na ang sosyal ng promo ng pelikulang eto. Mamigay ba naman sila ng libreng kopya ng libro. Sana gawin din nila eto para sa Catching Fire at Mocking Jay. Asa naman ako.